John 20
Ithuna Elingelalutho
1Ekuseni kakhulu ngosuku lokuqala lweviki, kulokhu kusemnyama, uMariya Magadalena waya ethuneni wafumana ukuthi ilitshe laselisusiwe emlonyeni wethuna. 2Yikho wafika egijima kuSimoni Phethro elomunye umfundi, lowo uJesu ayemthanda, wathi, “Sebeyikhuphile iNkosi ethuneni, kodwa kasikwazi ukuthi bayibeke ngaphi!” 3Yikho uPhethro lalowomfundi omunye baqonda ethuneni. 4Bobabili babegijima kodwa lowo omunye umfundi wamtshiya uPhethro wayafika kuqala ethuneni. 5Wakhothama walunguza phakathi wabona amaqhele elineni ekhonapho kodwa kangenanga. 6Khonokho uSimoni Phethro owayengemuva kwakhe wafika wangena ethuneni. Wawabona amaqhele elineni ethe qekele khonapho, 7kanye lelembu lokungcwaba elalikade limboze ikhanda likaJesu. Ilembu lelo laseligoqiwe lodwa, lingekho kwawelineni. 8Ekucineni lowo omunye umfundi owayefike kuqala ethuneni laye wangena. Wabona, wakholwa. 9(Babelokhu bengezwisisi emibhalweni ukuthi uJesu wayemele avuke kwabafileyo.)UJesu Ubonakala kuMariya Magadalena
10Abafundi basebebuyela emakhaya abo, 11kodwa uMariya wasala emi ngaphandle kwethuna ekhala. Wathi elokhu ekhala wakhothama walunguza ethuneni 12wabona izingilosi ezimbili zigqoke okumhlophe zihlezi lapho isidumbu sikaJesu sasikade sikhona, enye ngasemakhanda, enye ngasezinyaweni. 13Zambuza zathi, “Mama, ukhalelani na?” Wathi, “Bayisusile iNkosi yami, kangazi ukuthi bayibeke ngaphi.” 14Khonapho wasephenduka wabona uJesu emi khonapho, kodwa kananzelelanga ukuthi kwakunguJesu. 15Wathi, “Mama, ukhalelani na? Ufuna ubani na?” UMariya wayesithi kumbe ngumlimi, wasesithi, “Mnumzana, nxa kunguwe omthetheyo, ngitshela ukuthi umbeke ngaphi ukuze ngiyemthatha.” 16UJesu wathi, “Mariya.” Waphendukela kuye wamemeza ngesiHebheru wathi, “Rabhoni!” (okutsho ukuthi Mfundisi). 17UJesu wathi, “Ungangibambi, ngokuba kangikabuyeli kuBaba. Kodwa hamba kubafowethu ubatshele uthi, ‘Sengibuyela kuBaba njalo uYihlo, kuNkulunkulu wami, uNkulunkulu wenu.’ ” 18UMariya Magadalena waya kubafundi elombiko wokuthi wayeyibonile iNkosi eyamtshela lokhu.UJesu Uziveza Kubafundi
19Kusihlwa ngalolosuku lokuqala lweviki, abafundi babendawonye behluthulele iminyango ngoba besesaba abaJuda, uJesu wafika wema phakathi kwabo wathi, “Ukuthula kakube kini!” 20Esekutshilo lokhu wabatshengisa izandla zakhe lohlangothi lwakhe. Abafundi bathaba bafa nxa beyibona iNkosi. 21UJesu waphinda wathi, “Ukuthula kakube kini! Njengoba uBaba engithumile, lami ngiyalithuma.” 22Esitsho lokho wabaphefumulela wathi, “Yamukelani uMoya oNgcwele. 23Uma lithethelela loba ngubani izono zakhe, sezithethelelwe; uma lingazithetheleli, kazithethelelwa.”UJesu Uziveza KuTomasi
24UTomasi (othiwa nguDidimu), omunye wabaLitshumi Lambili, wayengekho kwabanye abafundi uJesu aze afike. 25Kwathi lapho abanye abafundi bemtshela ukuthi babeyibonile iNkosi, wathandabuza wathi, “Ngaphandle kokuthi ngibone izibavu zezipikili ezandleni zakhe ngibeke umunwe wami emanxebeni ezipikili, ngifake isandla sami ohlangothini lwakhe, kangisoze ngikholwe.” 26Sekudlule iviki abafundi bakhe babesendlini njalo, loTomasi elabo. Lokuba iminyango yayihluthulelwe uJesu wafika wema phakathi kwabo wathi, “Ukuthula kakube kini!” 27Wasesithi kuTomasi, “Beka umunwe wakho lapha; bona izandla zami. Yelula isandla sakho usibeke ohlangothini lwami. Khawula ukuthandabuza ukholwe.” 28UThomasi wathi kuye, “Nkosi yami, Nkulunkulu wami!” 29UJesu wasemtshela wathi, “Usukholiwe ngokuba usungibonile; babusisiwe labo abathi bengabonanga kodwa sebekholiwe.” 30UJesu wenza eminye imimangaliso eminengi abafundi bakhe bekhangele, kodwa engabhalwanga kule incwadi. 31Kodwa le ibhaliwe ukuze likholwe ukuthi uJesu unguKhristu, iNdodana kaNkulunkulu, njalo ukuze kuthi ngokukholwa libe lokuphila ngebizo lakhe.
Copyright information for
NdeIBE